廣告

2015年9月24日 星期四

派成績表喇~!!!!!!!



9月20日星期日


三年一次嘅 Body check 又嚟喇 , 今次媽媽 book 咗去睇古醫生 , 呢個醫生第一次睇 , 點解揀佢 ?因為佢係一個有醫德同愛小動物嘅醫生 , 加上佢不時响專頁度分享狗狗醫療資訊及心得 , 教曉媽媽好多嘢呢~!!

三點半去到診所 , 醫生做緊手術 , 所以延誤咗診証時間 , 於是媽媽帶我出診所附近行吓 , 就發生咗一件不負責任嘅事件 , 話說 : 有一對男女 , 拖住一隻小狗行過馬路 , 小狗忽然响馬路中心大便 , 完事之後...............個 pair 男女行咗去攞車 , 開咗車門個女主人攞咗紙巾出嚟 , 準備行去執返啲手尾 , 就响嗰刻...............有架車想泊佢哋個位 , 溜後一定車中啲便便 , 嗰 pair 男女無阻止架車溜後 , 唔知係咪想車中咗就唔駛執 , 可惜打唔响個如意算盤 , 架車差少少就中招 , 嗰女主人行返去架車想走( 以為車中咗 ) , 媽媽即時大聲叫佢執返啲便便先走 , 嗰女主好無奈地行返出馬路清理 , 跟住啤住媽媽 , 點解有啲咁唔負責人嘅狗主 , 將心比己 , 自己架車車中啲便便又點呢 ? 唔只車主會好嬲 , 搞到成條街都係屎印 , 臭氣燻天 , 咪搞到好多人都憎狗囉 , 希望所有狗主自律呢~!!


等咗半個鐘有多 , 終於見到古醫生 , 醫生讚我有腰又無肚腩 , 身形好 fit , 耳仔又乾淨 , 牙仔有少少牙石 , 醫生仲睇得出媽媽有幫我清牙石呢 , 跟住同我抽血 , 可惜只抽得少少 , 醫生話我隻手啲血管太幼 , 於是响我條頸剃咗一忽毛 , 方便抽血 , 真係話咁快就抽完半支血 , 响等報告嘅時候 , 媽媽問咗醫生好多問題 , 最想知點解有時我會胃痛 , 痛到抽住個胃 , 間唔中仲會嘔呢 , 醫生分析咗幾個原因 , 媽媽初時有啲擔心 , 報告出咗 , 所有指數都正常 , 仲好靚仔~!!  醫生嘅所有原因都即時唔成立 , 睇埋呢個醫生都揾唔到原因.............爸媽話盡咗力就算 lu ~!!


其實佢哋又駛咩嘢咁擔心我 , 我有份咁靚仔嘅報告 , 佢哋應該高興先啱~!! 



報告咁靚仔 , 一定要同我去公園行吓慶祝一番~!! 




六點鐘行真係幾舒服 , 睇吓我玩得幾開心~!! 



行咗半個鐘就返屋企 , 洗完手腳吹完毛 , 食埋糧我就要休息 , 爸媽返嫲嫲家做節食飯 , 咁就過咗一個愉快嘅週日~!! 








28 則留言:

  1. 你既報告全部都係正中間,真係好FIT喎
    真係好健康既毛孩呀^^

    回覆刪除
  2. 咕碌仔咁叻,要扭阿娘整啲正嘢食

    回覆刪除
    回覆
    1. 有呀有呀,媽媽整咗三文魚雞肉比我食呢。

      刪除
  3. 咕碌媽, 為你o既正義感鼓掌!
    如果個個養寵物都負責任
    咁社會就會更加美好

    咕碌仔, 你個 report 好靚呀
    一定係爸媽照顧得你好好

    回覆刪除
    回覆
    1. 碌媽:我真係好有正義感,有時碌爸都驚我會比人打呢,卡卡。
      咕碌:你講得好啱,多得爸媽嘅悉心照料。

      刪除
  4. 安全通過,驗血結果醫生都給100分啦!
    你要繼續健康活潑 '⌒ ♡ ⌒'

    回覆刪除
  5. 咕碌同個報告一樣咁靚仔,証明你全家人都好叻叻呢!
    做個有公德心同負責任嘅主人,除咗係份內事,自己嘅毛小孩都會得人鍾意嘛!

    回覆刪除
    回覆
    1. 聽到Waii 咁講..........咕碌家好開心呢。
      無錯,做個有責任感嘅主人係最基本嘅,認同你講呢。

      刪除
  6. 乜人都有, 咕碌有幸, 有個好媽媽 ^^

    回覆刪除
  7. 報告咁靚仔,因為有個好媽媽囉!先至培養好BB,又乖又健康又得人鍾意呢!來!抱抱呀!

    回覆刪除
    回覆
    1. janejane 快啲約媽媽去街,咁咪可以抱我囉。
      媽媽聽到你咁講好開心呢。

      刪除
  8. 好高興見到圓咕碌份報告咁靚仔,要繼續努力健健康康過日子。

    回覆刪除
    回覆
    1. 謝謝 Man Man 一直咁關心我,我會繼續努力,錫哂你呢。

      刪除
  9. 嗰啲人真係好自私, 帶狗狗出街又唔帶水和紙, 攪到其他人踩到. 又連累到有公德的狗主比人鬧! 比人見到時又攞隻狗嚟出氣!

    回覆刪除
    回覆
    1. 唉.........媽媽情願做衰人,比個女主人啤,都要佢哋執返啲便便,就係唔想影響到其他人呢。

      刪除
  10. Congrats Babe~Your Daddy Mummy treat you so nice, confirm no issue at all :) Somemore 有腰又無肚腩 , 身形 fit than me lor XD
    P.S. Sad to know for your bad experience...(a lot of selfish people in the world)

    回覆刪除
    回覆
    1. 好嘢.........原來靚姐姐同我一樣擁有一副咁靚嘅body ,開心呢。
      如果每個人都有一棵善心同責任感,世界就會好美好。

      刪除
  11. 祝圓咕碌一家中秋節快樂!


    回覆刪除
  12. 恭喜恭喜, 好好成績呢! 要一直keep落去呀! :)

    回覆刪除
  13. 恭喜圓咕碌咁叻叻,全靠媽咪既細心照顧咋,快D鍚啖媽咪啦!!!

    回覆刪除
    回覆
    1. 我靜靜雞話你知吖...............我每日都要錫啖媽媽架 , 多謝佢對我無微不至嘅愛呢~!!

      刪除