復活節第三撃同第四擊

3月27日星期日


休息咗一日 , 又係我出動嘅時候 , 由於爸媽尋日玩得太攰 , 所以今日唔行山 , 改去南生圍 hea 行 , 有草地比我跑 , 去邊都無所謂呢~!!

春天嘅南生圍..................又是另一番美景

綠草如茵 , 同媽媽影返張合照留念~!! 

爸爸同媽媽的好友 , 佢哋好錫我呢~!! 

另一邊嘅蘆葦草開始枯萎

坐定定做模豆比爸爸影

姐姐同我同媽媽影合照留念

難得太陽伯伯出嚟 , 哂多啲就有多啲鈣質 , 啱哂我~!! 

睇吓我同媽媽幾寫意

去士多食咗個 tea , 又跑吓草地先..................

最後送上全體大合照 , 係咪好 sweet 呢 ?

有腳架真好 , 可以同爸媽影多啲全家福留念~!! 

3月28日星期一

媽媽一早book 咗今日帶我去打一年一度嘅防疫針 , 離遠見到診所門口已經騰哂雞 , 睇開個醫生已經唔接打針服務 , 媽媽唯有揾個女醫生幫我打 , 醫生姐姐讚我個 body 好 fit , 以為讚吓我 , 我就會比佢打針 , 我不停响護士姐姐懷抱中掙扎 , 搞到醫生叫人幫我帶喇叭 , 帶咗都搞唔掂 , 媽媽唯有自己抱返我 , 我嗰心即刻定哂 , 就係咁..............先可以順利完成打針服務 ~!! 

睇吓我個樣幾唔 like 响診所

打完針...................返到屋企陪媽媽睇電視 , 睇睇吓瞓著咗呢~!! 

呢個星期我要乖乖响屋企休息 , 期待清明節同朋友仔去街街呢~!! 

派成績表喇~!!!!!!!

9月20日星期日


三年一次嘅 Body check 又嚟喇 , 今次媽媽 book 咗去睇古醫生 , 呢個醫生第一次睇 , 點解揀佢 ?因為佢係一個有醫德同愛小動物嘅醫生 , 加上佢不時响專頁度分享狗狗醫療資訊及心得 , 教曉媽媽好多嘢呢~!!

三點半去到診所 , 醫生做緊手術 , 所以延誤咗診証時間 , 於是媽媽帶我出診所附近行吓 , 就發生咗一件不負責任嘅事件 , 話說 : 有一對男女 , 拖住一隻小狗行過馬路 , 小狗忽然响馬路中心大便 , 完事之後...............個 pair 男女行咗去攞車 , 開咗車門個女主人攞咗紙巾出嚟 , 準備行去執返啲手尾 , 就响嗰刻...............有架車想泊佢哋個位 , 溜後一定車中啲便便 , 嗰 pair 男女無阻止架車溜後 , 唔知係咪想車中咗就唔駛執 , 可惜打唔响個如意算盤 , 架車差少少就中招 , 嗰女主人行返去架車想走( 以為車中咗 ) , 媽媽即時大聲叫佢執返啲便便先走 , 嗰女主好無奈地行返出馬路清理 , 跟住啤住媽媽 , 點解有啲咁唔負責人嘅狗主 , 將心比己 , 自己架車車中啲便便又點呢 ? 唔只車主會好嬲 , 搞到成條街都係屎印 , 臭氣燻天 , 咪搞到好多人都憎狗囉 , 希望所有狗主自律呢~!!


等咗半個鐘有多 , 終於見到古醫生 , 醫生讚我有腰又無肚腩 , 身形好 fit , 耳仔又乾淨 , 牙仔有少少牙石 , 醫生仲睇得出媽媽有幫我清牙石呢 , 跟住同我抽血 , 可惜只抽得少少 , 醫生話我隻手啲血管太幼 , 於是响我條頸剃咗一忽毛 , 方便抽血 , 真係話咁快就抽完半支血 , 响等報告嘅時候 , 媽媽問咗醫生好多問題 , 最想知點解有時我會胃痛 , 痛到抽住個胃 , 間唔中仲會嘔呢 , 醫生分析咗幾個原因 , 媽媽初時有啲擔心 , 報告出咗 , 所有指數都正常 , 仲好靚仔~!!  醫生嘅所有原因都即時唔成立 , 睇埋呢個醫生都揾唔到原因.............爸媽話盡咗力就算 lu ~!!

其實佢哋又駛咩嘢咁擔心我 , 我有份咁靚仔嘅報告 , 佢哋應該高興先啱~!! 

報告咁靚仔 , 一定要同我去公園行吓慶祝一番~!! 

六點鐘行真係幾舒服 , 睇吓我玩得幾開心~!! 

行咗半個鐘就返屋企 , 洗完手腳吹完毛 , 食埋糧我就要休息 , 爸媽返嫲嫲家做節食飯 , 咁就過咗一個愉快嘅週日~!! 

炎夏殺手病

由Yahoo Blog 搬過嚟(累積瀏覽 713)

6月19日星期二

由於我屋企部電腦無啦啦壞咗(有待修理) , 所以我上個星期去街街篇 blog 要順延 , 出住篇健康手冊比大家睇住先 , 之前睇到一篇文章(獸醫有話兒) , 提到中暑/高温症嘅病徵 , 預防及處理手法 , 覺得寫得好好 , 想同大家分享一吓~!!  加上上個星期温度高達33度................竟然仲有狗主同狗狗著衫出街 , 藉著夏天嘅來臨 , 好想大家了解同認識多啲呢個病嘅成因呢 ~!!



中暑 (Heart Stroke)\高溫症 (Hyperthermia)

夏天快到，很多主人都會帶大家嘅小寶貝出外走走，跟太陽伯伯玩游戲，但請注意.............潛在中暑嘅危機~!!

由於貓貓狗狗身上披了厚厚嘅毛，減低牠們的散熱功能，所以牠們嘅散熱方法主要靠舌頭和沒有毛發幅蓋嘅皮膚，如腋下、肚皮和大脾內側。如在短時間內，體溫突然過高而身體又不能自動調節，過高嘅體溫會對身體嘅器官和細胞造成傷害，而這些傷害可能是短暫，也可以是永久性，嚴重的會引致死亡。

高危一族：扁面的貓貓狗狗 (Brachycephalic breed)
體形肥胖嘅動物
曾有中暑病歷嘅動物
有心臟病或呼吸系统疾病嘅動物
年纪老邁或過份好動嘅動物
厚身毛或長毛嘅動物
中暑常見的症狀：喘氣\呼吸困難
流口水\起白泡
牙肉顏色變藍\紫或鮮紅色（bright red)
昏迷\抽筋\休克
體溫超過40度
血尿\少尿\無排尿
脫水
嚴重的會引致凝血能力疾病如（Disseminated Intravascular Coagulation, DIC）的併發症，身上可能會出現紅色斑點，內出血或吐血
處理方法

	如見到以上徵狀，要立刻為牠降溫，要用流動的水不停地蓋滿全身，尤其腋下、大脾內側和手腳掌之間的位置，可助快速降溫，並到最近的獸醫診所接受治療。要不時量度體溫，如體溫下降至39•5度要立停止，因為過度降溫可能引致低溫症。
	切忌使用冰水降溫，因冰水會令皮下血管收縮這反而減慢降溫速度令中暑情況嚴重。切忌用水直接射向動物的口，這樣是不能降溫，而且阻礙動物呼吸和散熱。

因為急性的中暑可能導致多重器官衰竭，儘管降溫成功也要留院觀察，觀察有没有因中暑而引致的併發症和器官衰竭的情況。

預防方法但最好的方法都係預防勝於治療，預防方法包括
1）在家中放置多個水瓶，減低脫水的機會, 也可在水中加上冰粒
2）要保持家中空氣流通和溫度不要有太大上落
3）盡量避免在烈日當空的時候外出
4）最好在日落後兩小時才外出散步，因剛日落時地面仍然在散熱中，地面的溫度仍然高，有機會中暑
5）如要去戶外活動，記得帶備足夠的水飲用，預防脫水，也可以預備一些冰粒加到水中。要不時向腋下和大脾內側灑水降溫
6）不要獨留小狗在車中或密封的寵物袋中
7）避免刺激或給壓力予高危的扁面貓貓狗狗或是有心臟和呼吸系統疾病的動物。




鳴謝 Forever Pets 提供以上資料