圓咕碌日記 : 1月 2014

2014年1月29日星期三

2014 賀年相出爐喇~!!!!!!!!

1月29日星期三(年廿九)

送蛇迎馬賀年相出爐喇 , 希望大家會鐘意呢輯相 , 因為媽媽百忙中抽時間同我影呢~!!

首先" 咕碌 " 同大家拜過早年先 , 恭喜發財~!!!!!!!!

恭祝大家 " 荷包漲爆 "

點少得祝大家 " 健康是福 "

" 招財進寶 "

" 五福臨門 "

黃金碌碌迎馬年

精神爽利過肥年

過年又點少得水仙花呢~!!

最後送上我嘅賀年沙龍相比大家睇~!!

哈哈...............希望我呢個賀年碌為我進帳不少利是錢呢~!!

最後祝大家一本萬利 , 一團和氣 , 出入平安 , 萬事勝意 , 恭喜恭喜~!!

2014年1月24日星期五

慈善步行 2014

1月19日星期日

之前因為生日 , 所以要將呢篇 blog 押後到今日先至出 , 希望大家唔好介意 , 講番嗰日..............要一早七點鐘起床 , 對於我呢個大少爺嚟講真係早咗少少 , 不過為咗做善事 , 我絕對經得起呢個考驗 , 我哋仲約埋"哈比"家一齊行呢~!!

嚟到會場...............哈比家未到 , 唯有介紹吓今次主辦單位比大家認識~!!

沿途有清晰嘅指示牌教大家點去活動場地 ~!!

原來今次嘅慈善步行 , 係行我最熟悉嘅迪士尼樂園 , 對我嚟講簡直 easy job ~!!

我哋就係由呢度起步 , 可惜"哈比"家遲到 , 全部人已經出發哂 lu , 剩低我哋一家人响度等 , 等到九點鐘工作人員叫我哋行 , 如果唔行就會無得行呢 , 唯有行住等................啦~!!

行到嚟樂園門口 , 我決定响度等哈比家 , 一家人行太悶喇 , 多啲人熱鬧啲呢~!!

好嘢..............終於等到"哈比"(藍色衫) , "卡卡"(粉紅橫間衫) , 仲有 "德德 "(灰色衫) 出現呢~!!

大家行到嚟鯨魚噴水池又影吓相先~!!

行入啲就係呢個許願池

貓貓都嚟支持步行 , 不過佢舒服啲................全程响主人個背部上面坐 , 唔駛落地呢 , 睇唔出佢足足重我一倍咁多 ~!!

今年大會搞搞新意思 , 揾兩個姐姐揸住呢個米奇大相框 , 比步行人仕影吓相 , 不過都幾多人排隊 , 一場嚟到唔影又唔得 , 影咗出嚟又幾得意呢~!!

幾經辛苦終於都行咗一圈 , 嚟到終點站 , 睇吓我幾受啦啦隊姐姐歡迎~!!

跟住去換領站換禮物袋~!!

行到大家熱哂 , 係時候食番啲嘢補充吓體力~!!

食咗少少零食 , 跟住嚟呢度排隊影吓相 , 坐上第一好威水~!!

媽媽話 : 影埋印有你個名張証書先夠威水呢 , 卡卡~!!

睇吓"哈比" "卡卡"同 "德德 " 都有上呢個台留倩影~!!

最後行番出樂園影張大合照留念~!!

跟住一齊落元朗食 lunch , 媽媽比咗少少飯我食作為今次嘅獎勵 , 我哋食緊飯嘅時候 "哈比 " , "卡卡 " 攰到瞓著咗 , 証明佢哋先至係大大少爺同大大少姐呢 , 卡卡 ~!! 返到屋企媽媽幫我洗白白吹毛毛 , 跟住同爸爸瞓番個靚覺 , 咁就過咗一個愉快嘅星期日~!!

2014年1月21日星期二

1月21日星期二

今日係我嘅大日子 , 仲係今年最後一過嘅單位數字生日 , 快樂嘅時光過得特別快 , 唔想認老都唔得呢~!! 每年到咗呢一日 , 爸媽一定訂個蛋糕同我慶祝 , 今年都唔例外 , 聽講呢個蛋糕好特別架 , 有幾特別 ? 等我拆開佢睇吓先................!!

嘩..............呢個蛋糕真係好靚呀 , 隻狗仔原來係依照我個樣嚟做架 , 都有幾分似 , 個鼻做得唔係咁似 , 仲有個下巴最唔似 , 我邊有咁多白色毛毛呢~??