復活節第一激遊大澳

4月18日星期五

一連幾日復活節公眾假期 , 爸媽一早就幫我安排好哂所有節目 , 今日第一激就係約咗朱屎 family 一齊暢遊大澳 , 等我呢位導遊介紹一吓大澳有咩嘢好去處啦 , 去片~!! 

到咗大澳碼頭 , 當然要影張相留念~!! 

嚟到大澳一定要食呢度嘅大大粒魚旦

 

 

魚旦超彈牙 , 又大大粒 , 好好味呢~!! 

 

仲有一定要食新鮮整嘅滷水墨魚 , 同埋飲解渴嘅紫貝天葵~!! 

 

 

啲大人掃完一輪街 , 嚟到呢間幼稚園 , 見到牆上呢幅代表大澳嘅畫 , 就揾我呢個 model 客串一吓~!! 
 

 

沿途會發現一啲咁有特式嘅裝飾

大家如果想了解多啲大澳 , 不況入呢度行吓呢~!! 

今日都好多人 , 所以沿途都要媽媽抱住 , 無得落地

咁大個仔都係第一次同鯊魚影相 , 有少少驚添~!! 

上次嚟無食到芝士焗蠔 , 今次柴娃娃一齊食 , 真係好鮮甜好美味

好可愛嘅雞泡魚裝飾

好懷舊嘅店鋪

行咗咁耐................帶大家嚟呢間 Cafe 嘆個 high tea , 特別鳴謝 : 殷師奶嘅好介紹

 

坐响咁舒適嘅櫈等位 , 真係好寫意

tiramisu 同 coffee 係無得輸嘅 , 仲有木康布甸都好滑好味道

 

爸爸叫咗呢碗麵就不值得推介 , 啲麵太淋好難食

响咁舒服嘅露天環境 high tea , 一定要影番張全家福留念~!! 

响呢度望出去 , 對面仲有間中國式嘅房子

望向另一邊 , 風景超正

臨走同朱屎 family 影張合照留念

咁耐無見朱屎 , 依然咁靚女呢

行到嚟呢間時裝舖 , 坐响門口影張相 , 點知吸引咗一大班人圍觀影我 , 搞到媽媽即刻抱我走 , 最好笑係..............原來啲人以為我係呢間舖嘅 PR 狗 ~!! 

終於行到嚟村口喇................

過咗呢條橋

我同朱屎就可以自由活動呢

呢條木橋係比啲村民出入用嘅

同朱屎影番張合照留念

經過呢間屋 , 呢隻狗狗原本 down 响度休息緊 , 點知見到我哋就即刻企起身 , 仲不停請請 , 到我哋走都未郁過 , 因為又有其他人影佢相 , 呢隻真係名符其實嘅 PR 狗呢 , 卡卡~!! 

咁大個仔都未坐過龍船 , 坐上去影張相威吓先

行咗一圈...................係時候回程 lu 

其實大澳有好多地方行 , 好似呢間咁有特式嘅貓 cafe 

 牆上嘅畫都係用返大澳做題材

仲有好多生動嘅貓咪畫賣

點少得各式各樣嘅紀念品 , 鐘意貓咪嘅人仕 , 一定唔可以錯過呢~!! 

鐘意飲茶嘅朋友仔 , 又可以行吓呢間茶莊

當然唔少得買返啲大澳特產

生活响大澳嘅狗狗 , 原來都好寫意

仲有貓咪.............都肥肥白白

相信呢度嘅花膠係有保証嘅 , 因為價錢一啲都唔平呢 , 卡卡

睇埋個日落.................坐六點班船出返屯門

响屯門攞車 , 然後落元朗食雞粥 , 食到九點先各自回家 , 今日玩得真係好盡興 , 返到屋企洗完手腳吹埋毛 , 我就即刻揾周公傾計 , 咁就過咗假期嘅第一日~!!